رسالة إلى الدكتور مهاتير - شعر : معاوية المهدي - من ديوانه ( حصة حساب )

رسالة إلى د / مهاتير ... !!
شعر : معاوية المهدي
( من ديوانه حصة حساب )


دكتور : مهاتير ..
بعد التحية والاحترام ..
وكلام قصادك يرتعش ..
من هيبة اسمك والمقام
اسمي : إبراهيم
ساكن : فِــ رِيح دير الملاك
وسطوحي بِنّية حمام ..
وبَصَلّي دايما .. في الحُسين ..
جنب المقام
بلّغ سلامي لكل طفل يقلدك
في عيال ماليزيا
قول لي بصراحة :
إزاي قدرت تفك روحك م الحمول
وتفُط عكس الإنجذاب ..
وتعاند اللي اخترعوا ( فيزيا )
أنا قمت برضه بثورتي بس المعادلة معقدة
و ( الكيميا ) عندي ..
لسّه محتاجة لمحفز + حرارة
علشان تِنَقّي أكسيدات فقع المرارة !!!
والشهدا ( أحياء ) في الميدان ..
واقفين يراقبوا ..
وأنا تُهت في حلول امتحان ..
دمهم هوه اللي كاتبه !!
ما تقول لي حَل المشكلة ؟!
كاتبين فــ ضهر الأسئلة ..
الثورة مش فورة وجنان ..
ولا موج عنيد في الدوّامات ..
حادف مراكبه !!!
الثورة حِلْمْ ... و نَط في إيدين الحقيقة ..
علشان تنتور بذرته .. في أراضي بور
بالله عليك ..
عَلِّمني أثور على نفسي .. مَرّة
خليني بعد ما ثرت ... أثور !!!
دكتور مهاتير .. يا طوفان هادي
عارف مقامات الناس في بلادي
و بناتي الحور ...
وحكاوي الناس الشقيانة
لكن ما اعرفش النيل كان ليه ..
ممنوع في غيطانه الدبلانة ؟!!
و لاّ انت إزاي خلّيت الناي ..
يعزف ألحانه الفرحانة ..
بالبوصة الغاب ؟!!
وإزاي روّضت أسود الغاب ؟!!
وإزاي دوّبت العلم فــ كاس ..
وسقيت التايه فــ رْجعلك ..
وكأنه ما غاب ؟!!
دكتور مهاتير :
برجاء .. تبعتلي الرد بسرعة
قبل ما دم الشهدا يضيع !
الحقد فــ قلب الماضي .. وضيع
حَ يْدَنّس شرف الفوران ..
ويتوّه قلبي فــ دوران ..
ويسيَّح دم الرُمّان ..
على صخرة حلم التطبيع !!!
وأخيرا : لك ألف سلام ..
و لمصر سلام ..
للشهدا سلام ..
من قلب بريء .. وجريء .. ومصَحْصَحْ
بيشد الجدع المتفحْفحْ ..
لسنين في البير ...
فيكون في سنين القحط ... ملاذ
ويكون في الشدة .. الشيخ مهاتير .